МУСЛУНЫД  АРЛЫДТÖ ОЗ ЮАВ

 

Автор Эвелина Пиженко.

Комиöдiс Алексей Попов

 

Öти юкöна пьеса, кодi зэв ёна лöсялас шылада теш пуктöм вылö.

 

Ворсысьяс:

ЛЮБА ПÖЧ. Топыд тэчаса да зумыд оласнога пенсионерка. Грездса олысь. Том дырйиыс радейтлöма Кузьма пöльöс. Олö öтнас, верöсыс кувсьылöма.

КУЗЬМА ПÖЛЬ. Пенсионер жö. Косньöдиник, неыджыд тушаа, восьлалö чеччалiгтыр. Том кадас радейтлöма жö Люба пöчöс. Гöтырыс кувсьöм бöрын öтнасöн жö олö.

ЛЮБАШКА. Кузьмичöс пöльöн шуысь. Студентка. Олö да велöдчö карын, гожöм кежлас воöма пöльыс дорö. Радейтö Лёшаöс.

ЛЁША. Любаöс пöчöн шуысь. Студент. Олö карын, локтöма грездас пöч дорас. Радейтö Любашкаöс.

СУСЕДКА. Татшöмыс эм быдлаын. Ставсö аддзылöма, ставсö кывлöма, став йылысь быдтор тöдö.

 

 

Медводдза петкöдчöм

 

Сцена вылын грездса керкаяс, шöр туй. Мыччысьö Люба пöч. Мöдарсяньыс петö Суседка.

 

СУСЕДКА. Видза олан, Матвеевна!

ЛЮБА ПÖЧ. Чолöм, суседка.

СУСЕДКА. Кытчö нин асывсяньыс тэрмасян. Он-ö нин концерт вылад котöрт, мед бурджык пуксянiн тшапнитны?

ЛЮБА ПÖЧ ( шензьöмöн). Концерт? Кутшöмкö концерт али мый миян грездын лоас?

СУСЕДКА. Эн на мöй кывлы? Миянö артистъяс локтöны, клубын концерт петкöдласны. Со нин и миянöдз воис эсiйö… шоу-бизьнесыс!

ЛЮБА ПÖЧ. Колö нуклы та йылысь висьтавны. Зэв нин ёна ме ордын гажтöмалö да. Сiдзи и видзöдчö бöр карас уйкнитны. Мед ветлас да видзöдлас ассьыс хип да хопъяссö.

СУСЕДКА ( быттьö дыр арталöм бöрын). Оз, оз гажтöмтчы тэнö пöчöн шуысьыд. Эн майшась та понда. Сiйöс öнi миян грездысь зорйöн он тодмышкав.

ЛЮБА ПÖЧ ( шензьöмöн). Мыйкö сы йылысь тöдан али мый нö?

СУСЕДКА. Быттьö ачыд нинöм он тöд. Став грездыс тöдö, а тэ тöдтöм улö лэтчысьöмыд.

ЛЮБА ПÖЧ. Тэ вай тöлкöн да ладöн висьтав. Мый нö  Лёшöыскöд лоöма?

СУСЕДКА ( китшнитыштлö). Гашкö, нинöм на сыкöд оз ло… Но ачыд öд тöдан, кыдзи да мый том дырйиыд овлö!

ЛЮБА ПÖЧ. Тэ вай висьталан кö висьтав. А то депутат моз ылöсас сёрнитан. Тэ збыльсö висьтав!

СУСЕДКА. Невестаöс сiйö аддзис. Лёшöыд тэнад! Збыльысь нö мöй он тöд?

ЛЮБА ПÖЧ. Збыльысь öд нинöм ог тöд! А кодöс нö эськö аддзöма? Кодлысь?

СУСЕДКА. Кузьмичöс пöльöн шуысьсö. Нучкаыс сы дорö воöма. Пöльсö видлыны. Со и тэнад Лёшöыдкöд и… кыдз эськö бурджыка шуны? Каньялöны.

ЛЮБА ПÖЧ ( скöрмыштöмöн). Кыдзи каньялöны? Тэ вай, суседка, кывъяснад эн шыблась! Гашкö, немвиччысьтöг кöнкö паныдасисны, сёрнитыштiсны, йöзыслöн кывйыс нин гилялö. Висьталöны быд нинöм абусö.

СУСЕДКА. Ог тöд и тöдны ог кöсйы, кутшöм сёрни на костын вöлi… А со град йöр сайын окасьöмсö ас синмöн аддзылi.

ЛЮБА ПÖЧ (дöзмöмöн). Кыдзи окасисны?!

СУСЕДКА. Ачыд быттьö он тöд! Вунöдiн али мый нö кыдзи ныла-зонмаыс окасьлöны?

ЛЮБА ПÖЧ. Лöсьöдлан жö эськö тэ ставсö да!

СУСЕДКА. Збыль! Сё збыль. Лöсьöдла кö, то мед пенсияöс менсьым водзö грöш вылö эз содтыны!

ЛЮБА ПÖЧ ( читкыралö синсö да бок ногöн матыстчö Суседкалань). Кузьмичöс пöльöн шуысьöс, шуан, аддзöма? Эсiйöс- беринöсьсö да рыжöйсö али мый?

СУСЕДКА. Абу, абу рыжöй. Еджыдiник сэтшöм.

ЛЮБА ПÖЧ. Кодлöн тай юрсиыс öтарö-мöдарö…( Петкöдлö.) Турун сарайын узьöм бöрын тай кутшöм овлö.

СУСЕДКА. Абу эськö дзугсьöм юрсиа да. Зэв на нöшта шыльыд. Кыдз артисткалöн.

ЛЮБА ПÖЧ ( некыдз ас пиас оз тöр). Тайö… эсiйö… кыз кынöмаыс али мый? Кокъясыс, конкö, мегыр кодь чукляöсь.

СУСЕДКА ( пельпомъяссö люптыштö). Абу, абу сэтшöм. Зэв на нöшта вöсньыдик и, мичаник…

ЛЮБА ПÖЧ ( дöзмöмöн). Мый? Кузьмичлöн? Вöсньыдик да мичаник!? Оз вермы лоны! Сiйö жö ачыс муртса мусьыс тыдыштö, сэтшöм латшкöс тушаа да. Оз, оз вермы сылöн вöсньыдик да мича нучкаыс лоны! Эн вай и сöр нинöм абусö.

СУСЕДКА. Мый нö тэ, Матвеевна, сэтшöма дöзмин? Шуа тай, мый том кадад мыйыс оз овлы да. Асьныс тöдöны, мый вöчöны.

ЛЮБА ПÖЧ. Найö, гашкö, мый оз тöдны да! Но ме найöс ас вöляасьны ог лэдз! Кöть кодöс, Лёшööй, бöръяс, но оз тайö рöдсьыс! ( Горöдö.) Лёшö! Лёшко, кöнi нö тэ?!. Котöрт öдйöджык гортад! Пöчыд сэтшöм чöскыд пöжас дасьтiс! ( Мунö.)

 

Сцена мöдарсяньыс мыччысьö Кузьмич. Чеччалан воськолöн мунö Суседка дортi. Мöдыс сiйöс чукöстö.

 

СУСЕДКА. Кузьмич, мый нö тэкöд лоис? Весиг со эн чолöмась.

КУЗЬМИЧ ПÖЛЬ ( быттьö сöмын öнi казялö Суседкаöс). О! Чолöм, сiдзкö. Он кö быттьö шмонит.

СУСЕДКА. Ме эськö и шмонитi, но тэ со вывтi нин тшап. Весиг йöзсö мунiгад он казяв.

КУЗЬМИЧ ПÖЛЬ. Нучкаöс со корся. Кад нин пажнайтны, а сылöн дукыс абу.

СУСЕДКА ( вашъялiгтыр). Аддзöмыд кытысь корсьны. Тэ сiйöс градйöръяс сайысь корсь.

КУЗЬМИЧ ПÖЛЬ. Код морыс нö сiйöс градйöръяс саяс кыскис?

СУСЕДКА. Гöгöрвоана кодi. Аслас кавалерыскöд окасьны сэтчö котöртiс.

КУЗЬМИЧ ПÖЛЬ ( дöзмыштöмöн). Тэ вай нинöм абусö эн бызгы! Кутшöм нö кавалер йылысь сöран?

СУСЕДКА. Кыдзи кутшöм? Люба пöч дорö нукыс воöма. Со сыкöд и окасьö.

КУЗЬМИЧ ПÖЛЬ. Мый нö нинöм абусö лöсьöдлан?

СУСЕДКА. Ме ог и мöвпав лöсьöдлыны. Ачыд ассьыс юав, он кö быттьö меным эскы! (Мунö.)

КУЗЬМИЧ ПÖЛЬ ( шлапкöдö бекъясас). Но, морыд! А ме ог и тöд, мый менам гортын татшöм неминуча. ( Горöдö.) Любашка! Ен югыдас пызйыштiн али мый?! Кöнi нö тэ?! Любка, марш гортö! ( Саймовтчö.)

 

 

Мöдöд петкöдчöм

 

Сiйö жö иныс. Сцена вылö котöрöн петöны Любаша да Лёша.

 

ЛЁША. Кывзы, а бура öд ми тэкöд мöвпыштiм, мый колö пышйыны асланым бать-мамысь  тайö грездас?

ЛЮБАША. Дерт жö! Менам бать да мам чайтöны, мый ме сiдз прöста мунi пöль дорö. А тэнад ай-мамыд сiдз жö дай. Некод оз тöд, мый ми öтлаын татчö воим!

ЛЁША. Менам весиг оз тöдны, мый тэнад вужйыс тайö грездсьыс.

ЛЮБАША. Менам öд оз жö тöдны. Тöдiсны кö, эськö, миян бöрся татчö котöртiсны.

ЛЁША. Ёна и шензясны, кор тöдмаласны!

ЛЮБАША. А öнi ме со весиг пöльлы ог висьтав, мый ми тэкöд аддзысьлам. Висьтала сöмын сэк, кор мунны татысь кутам. Весиг аддза, кыдзи сiйö нимкодясьны кутас!

 

Сцена вылö мыччысьö Кузьмич пöль. Чеччалiгтыр восьлалöмöн, быттьö салдат стройын мунö, матыстчö том йöз дорö. Сувтö да вöчö стрöг чужöм.

 

КУЗЬМИЧ ПÖЛЬ. Любка, вай марш гортö! Капустаа шыдыд кöдзалö!

 

ЛЮБАША ( Лёшалы). Ме сэсся муна.

ЛЁША. Бур. Аддзысям концерт дырйиыс!

 

Любаша мунö. Лёша тшöтш жö кöсйö вöрзьöдчыны, но Кузьмич сувтöдö сiйöс.

 

КУЗЬМИЧ ПÖЛЬ. А тэ, салага, сулав ас инад! Ать-два!

ЛЁША ( шензьöмöн). Ме? А мыйын нö делöыс?

КУЗЬМИЧ. А тэ вай висьтав веськыда, кутшöм тэнад планъясыс менам нучка вылö?

ЛЁША. А тэ мöй эсiйö… Любалöн пöльыс?

КУЗЬМИЧ ПÖЛЬ. Тэ вай пиньтö эн кеслы! Устав серти вочавидз!

ЛЁША. Устав серти кö, менам планъясыс зэв бурöсь.

КУЗЬМИЧ ПÖЛЬ ( нюммунлö, а сэсся немвиччысьтöг лыбзьö). Кыдзи, кыдзи зэв бурöсь?

ЛЁША. А мый танi лёкыс?

 

Сцена вылö петö Люба пöч. Зэв скöр чужöма. Синсö читкыртлöмöн видзöдлö Кузьмич пöль вылö, но шыасьö пöчöн шуысь дорас.

 

ЛЮБА ПÖЧ. Лёшко, а тэ вай гортö котöрт. Капустаа шыдыд дзикöдз кöдзалас!

ЛЁША ( лэптыштлö пельпомъяссö). Бур, бабö. ( Кузьмичлы.) Аддзысьлытöдз! ( Мунö.)

ЛЮБА ПÖЧ ( кутö сой бордöдыс мöдарлань мунны уськöдчысь Кузьмичöс). А тэ сулав!

КУЗЬМИЧ ПÖЛЬ ( шензьöмöн). Тэ нö, Матвеевна, мый лоин?

ЛЮБА ПÖЧ. Сiдзкö, тi со тадзи? Эз на удит зонмыс воны, а тi нин сылысь юрсö путкыльтанныд! (Кузьмич эськö зiльö мыйкö вочавидзны, но мöдыс оз сет.) А тэ, вай ланьт! Ме тiянлысь рутö бура тöда! Шашаритчанныд да мынны он вермы!

КУЗЬМИЧ ПÖЛЬ. А ме дорö нö тэнад кутшöм претензияыд?

ЛЮБА ПÖЧ. Претензия! Менам тэ дорö сы мында претензияыс, мый тэ весиг вöтасьнытö он куж!

КУЗЬМИЧ ПÖЛЬ. Тэнсьыд сямтö тöда да весиг ог шензьы.

ЛЮБА ПÖЧ ( нерыштö). Менсьым сям тöдысь петöма! Кытысь тэныд тайöс тöднысö?

КУЗЬМИЧ ПÖЛЬ. Кыдзи кытысь? Ме öд нинöм на эг вунöд.

ЛЮБА ПÖЧ.  Ой-ой! Эг пö вунöд? Мый нö тэ аслад розя юрнад помнитны верман?

КУЗЬМИЧ ПÖЛЬ ( гартыштö уссö ). Ме ставсö, Матвеевна, юрын кута.  Менам сiйö ок на бура дзуртö. Нинöм на эз вун

ЛЮБА ПÖЧ ( лöгасигмоз) Юрын кутысь аддзысьöма! ( Недыр видзöдö мöдарлань, а сэсся Кузьмичлань бергдчöмöн негораа.) Но? Мый тэнад эз вун?

КУЗЬМИЧ ПÖЛЬ ( вашмунöмöн). Кыдзи ми тэкöд том дырйиыд эсiйö… мусукасьлiм. Кыдзи клубад йöктынытö котравлiм, тöд вылын кута и… Кыдзи тракторнад тэнö новлöдлы…

ЛЮБА ПÖЧ. А кыдзи сэсся бöрас став грездöн трактортö гöпсьыс кыскисны, помнитан жö? А тракторыс эз весиг тэнад вöв! А менам айлöн!

КУЗЬМИЧ ПÖЛЬ ( мудера). А мый вöсна ми тэкöд гöптас веськалiм, эн на жö öд кöнкö вунöд? Али вунöдiн нин?

ЛЮБА ПÖЧ ( быттьö оз окотит казьтывны важсö). Мыйкö тай ме тайöс ог нин и помнит. Юыштöмыд кöнкö тэ вöлiн да та вöсна гуранас пырин!

КУЗЬМИЧ ПÖЛЬ ( ворсöдчигмоз). Окасим ми сэки тэкöд да сiйöн ускöттьöыс тайö лоис. Ме öд рульсö весиг киысь лэдзи. Чайтi, мый веськыд туй вылад тракторыд бура мунас, некытчö оз кеж. А сiйö, трустыд, эз гöгöрво менö да и кежöма. ( Ворсiгмоз ыршасьö чуньнас.) Ме ставсö на помнита!

ЛЮБА ПÖЧ. Помнитан кö, то вай веськыда висьтав, мыйла тэ Клюшина Вера вылас гöтрасин? Мыйла сы вылö, а эн ме вылö?

КУЗЬМИЧ ПÖЛЬ. А мый нö меным колис вöчнысö? Тэ жö водзджык Федька саяс чеччыштiн!

ЛЮБА ПÖЧ. А, гашкö, ме дзик бöръя здукöдзыс майшаси? Сельсöветас пырны нюжмаси, пыр виччыси, мый тэ мыччысян!

КУЗЬМИЧ ПÖЛЬ. Тэ жö ачыд шулiн, мый менö синнад аддзыны он кöсйы.

ЛЮБА ПÖЧ. Шуи, дерт! А мый тэ прöдавеч Зинаыскöд асылöдзыс лавкаас вöчинныд? Меным бабаяс тiян йылысь ставсö öд висьтавлiсны!

КУЗЬМИЧ ПÖЛЬ. Да öд ме сэки лавка пытшкöдзыс войбыд пызь да сакар мешöкъяс кыскалi.

ЛЮБА ПÖЧ. Тайö тэ Зинкаöс лавка кузьталаыс и пасьталаыс кыскалiн. А мешöкъясыс тэнад яндысьтöм син горулад асывнас узьтöм войсьыс мыччысисны!

КУЗЬМИЧ ПÖЛЬ. Ас садяд, Матвеевна, во. Эн лöсьöдлав нинöм абусö. Ми öд сэнi эг тай кыкöн продавечыскöд вöлöй. Сэнi нöшта грузчик Миш вöлi, Зиныслöн мусукыс. Ылöдiсны, Матвеевна, тэнö бабаясыд!

ЛЮБА ПÖЧ ( кутшöмкö кад чöв олöмöн мурталö кывлöмторсö, но оз кöсйы тайöс петкöдлыны да вöчö дöзмöм чужöм). Ылöдлiсны,шуан! Öнiтö позьö ставсö, мый юрад воас, висьтавны. Он нин тöдмав да.

КУЗЬМИЧ ПÖЛЬ ( ышлолалiгмоз). Да тэ öд и сэки эн кут тай бур йöзыслысь юасьны. Пырысьтöм пыр уськöдчин Федькаыскöд сельсöветö, гижсьöм йылысь корöм сетны. ( Öвтыштö кинас.) Эк тэ, Матвеевна!

ЛЮБА ПÖЧ ( быттьö дöзмöма). Тэ вай сёрни визьсö мöдлаö эн кежöд! Ме тэнö öлöда, мый кöть ачым кула, но ог лэдз, медым тэнö пöльöн шуысьыд менам нуккöд öтласисны!

КУЗЬМИЧ ПÖЛЬ ( дöзмö жö). Ёна тай колантор! Тэ кö паныд и ме паныд! Танi ми тэкöд, Матвеевна, öткодь мöвпаöсь! И веськыда кö, некор меным тэкöд тшöкöлдывайтнысö. Капустаа шыдöй менам кöдзалас дзикöдз. ( Дöзмöмöн чеччалiгтыр мунö.)

ЛЮБА ПÖЧ. ( лöгасьöмöн). Матвеевна, Матвеевна! А водзтi менö Любашаöн шулiс! ( Мунö мöдарланьö.)

 

 

Коймöд петкöдчöм

 

Кузьмич пöльлöн керка пытш. Кузьмич майшасигтырйи ветлöдлö öтарö-мöдарö. Сэсся сувтö да видзöдö залö.

 

КУЗЬМИЧ ПÖЛЬ. Со сiйö мый шуис, кула пö, а ог лэдз найöс öтласьны. Со öд кутшöм сылöн сямыс! Но и Матвеевна! ( Зумыштчылö, а сэсся быттьö чужöм вылас ловзьыштö.) Любовь Матвеевна… Любашка! Вöлöмкö, бабаяслöн сöрöмлы эскöма да сы вöсна мöд сайö петлöма. ( Бара ветлöдлыштö. Сэсся другысьöн сувтö да шеныштö кинас.) Эк, мый лоны лоас! ( Пуксьö пызан сайö,  босьтö кабала лист, ручка да гижö.) Лю-ба-ша… кор ывлаыс пемдас, лок миян инад… Эм сёрни… Алексей…ог, ог тадзисö гиж. Вывтi нин стрöга артмö да. ( Олыштö да бара босьтö киас ручкасö.) Лёха! Со кыдзи ме гижа!

 

    Кылö Любашкалöн горöдöм:» Дедö!» Кузьмич повзьöмысла чукралö кабаласö, оз тöд, кытчö сiйöс дзебны. Медбöрын уськöдö джоджас. Сцена вылö тэрыба петö Любашка.

 

ЛЮБАШКА. Дедö, ме дорö некод эз пырав?

КУЗЬМИЧ ПÖЛЬ ( майшасьöмöн). Тадз. Этадз…

ЛЮБАШКА ( аддзö джоджö уськöдöм кабаласö, разьö. Мунö сцена бокö да лыддьö). Любашка.. кор ывлаыс пемдас лок миян инад.. эм сёрни…Лёха. Ог тай нинöм гöгöрво. Ми жö сёрнитчылiм концерт вылын аддзысьны. ( Нимкодя нюммунö и висьталö залыслы.) Но и Лёшка, сэтшöм ышмысь. Либö жö романтик? ( Бергöдчö пöльыслань.) А тэ шуан, мый некод эз пырав?

КУЗЬМИЧ ПÖЛЬ ( оз тöд кытчö воштысьнысö. Видзöдö кабала вылö, кодöс кутö нучкаыс да оз тöд, кыдзи сiйöс босьтны) Сiдз, тадз.. Гашкö.. этадз.

ЛЮБАШКА (дзебö кабаласö, нимкодя окыштö пöльыслысь бандзибсö. ) Лыддьы, мый гижöдыс воис колана киö.! ( Котöрöн мунö.)

КУЗЬМИЧ ПÖЛЬ. Ачыс али мый кöсйö Матвеевнаыслы гижöдсö нуны? Гашкö, тадзисö и бурджык да. Быттьö и ачым со эг кут копрасьны сы водзын, а нучкаöй гижöдсö вайис. Пöльöй, шуас, джоджö уськöдöма вöлi. ( Нимкодя зыралö кияссö.) Мый лоны лоас! Кöнкö менам «Тройнöй» одеколон вöлi. ( Мунö.)

 

 

Нёльöд петкöдчöм

 

Сцена вылын бара грездса серпас. Шöртуй. Öтарсянь мыччысьö Суседка, мöдарсянь петö Любашка. Ныв скöр чужöма. Суседка наяна вашъялö.

 

ЛЮБАШКА ( кöсйö мунны Суседка дортi. Мыйкö ас улас моз висьталö ). Здрасте!

СУСЕДКА ( сувтö да панö сёрни). Чолöм! А мый нö тэ öтнадöн, мусукыдкöд венö воинныд али мый нö?

………………………….

……………………………

Продолжение пьесы и окончание — в полной версии сценария.

 

Дорогие друзья! Все, кого заинтересовала полная версия пьесы в переводе на коми язык, пишите мне на электронную почту ehvelina-p@yandex.ru  

Условия приемлемые.